3 may 2025-ci ildə Libraff kitab mağazalar şəbəkəsinin Park Akademiya filialında yazıçı İmran Əliyevin “Nemesis” adlı kitabının təqdimat və imza saatı keçirilib. Tədbirdə tanınmış ədəbiyyat və incəsənət xadimləri iştirak edib.
Kitabın önsöz müəllifi, görkəmli dramaturq Əli Əmirli çıxış edərək “Nemesis” romanının ədəbiyyat dünyasında yenilik olduğunu qeyd edib: “Bəzən gənc dramaturqlar təhlil etməm, fikir bildirməm üçün mənə öz əsərlərini göndərir. Mən isə onlara bildirirəm ki, bu yazı tərzi müxtəlif yazıçılar tərəfindən uzun müddət istifadə edilib. Siz özünüz olmalı, öz tərzinizi yaratmalısınız. İmranın “Nemesis” romanını oxuduqdan sonra bu tərz və yanaşmanın Azərbaycan ədəbiyyatında yenilik və eyni zamanda cəsarətli bir addım olduğunu düşündüm.
Əsər sadəcə hadisə axınının davamediciliyindən yox, insan psixologiyasının dərinliklərindən bəhs edir. Əminliklə deyə bilərəm ki, bu kitabı oxuyan hər kəs orada öz həyatından bir parça tapır və tapacaq.
Təqdimatda hər yaşdan, oxucu və ədəbiyyatşünas iştirak edib və çıxış edərək öz fikirlərini bildirib.
Biz də öz növbəmizdə İmran Əliyevə uğurlar arzulayır, yeni yaradıcılıq nailiyyətləri diləyirik.
