Şirvan şəhərində bu il Qurban bayramı münasibətilə 850 aztəminatlı ailəyə qurban payı verilib. Xeyriyyə aksiyası mərhum silah sənayesi naziri Yavər Camalovun sağlığında başlatdığı vəfatından sonra isə övladları tərəfindən davam etdirilən bir ənənə kimi hər il icra olunur.
Artıq illərdir ki, Yavər müəllimin övladları – Rəşad və Elşən Camalov qardaşları Qurban və Ramazan bayramlarında, eləcə də bir sıra əlamətdar günlərdə bu xeyirxah missiyanı davam etdirirlər. Onların təşəbbüsü ilə həyata keçirilən bu yardım kampaniyası bir sıra sosial kateqoriyaları – aztəminatlı ailələri, şəhid ailələrini, Qarabağ müharibəsi qazilərini, müharibə veteranlarını, Çernobil əlillərini və ümumilikdə həssas təbəqədən olan insanları əhatə edir.
Xeyriyyə aksiyasının təşkilati hissəsində isə Hacı Ramil Camalovun xüsusi rolu var. O, illərdir bu nəcib təşəbbüsün təşkilatçısı və koordinasiyaçısı kimi çalışır, yardımların düzgün və ədalətli şəkildə çatdırılmasına nəzarət edir. Yardımlar əvvəlcədən aparılmış siyahılara uyğun olaraq və növbəlilik, şəffaflıq prinsipi ilə paylanır.
Şirvan şəhərinin müxtəlif məhəllələrində yaşayan ehtiyac sahibləri, bu bayram günündə verilən dəstəyə görə təşəkkürlərini bildiriblər. Onlar qeyd ediblər ki, bu cür təşəbbüslər həm sosial həmrəylik, həm də mərhəmət ruhunun yaşadılmasında mühüm rol oynayır.
Biz də öz növbəmizdə bu gözəl ənənənin banisi olmuş mərhum Yavər Camalova Allahdan rəhmət, onun əziz ailə üzvlərinə isə can sağlığı və uzun ömür arzulayırıq. Onların göstərdiyi bu nümunəvi davranış cəmiyyətimiz üçün əsl vətəndaşlıq örnəyidir.
Mirsahib Rahiloğlu
