Azərbaycanın müxtəlif bölgələrində vətəndaşların üzərinə sonradan “gizli” şəkildə yazılan komunal borclar artıq adi hal almağa başlayıb. Amma bu dəfəki hadisə təkcə bürokratik laqeydlik yox, həm də sistemdə ciddi məsuliyyətsizlik ehtimalını ortaya çıxarır.
Qaradağ rayonu Qobustan qəsəbəsində bir müddət yaşamış Əzizov Elçin adlı vətəndaş 1999-cu ildə oradan qeydiyyatdan çıxaraq Lökbatan qəsəbəsində daimi yaşayışa köçüb. Həmin ildən etibarən nə Qobustanda yaşayıb, nə də orada hər hansı kommunal xidmətlə əlaqəsi olub. Lakin köçdüyü tarixdən düz 9 il sonra — yəni 2008-ci ildə onun adına guya “abonent kodu” açılıb və bu kod üzrə su borcu yığılıb.
Daha qəribəsi odur ki, 26 ildir həmin ünvanda yaşamayan bir vətəndaş indi İri Şəhərlərin Birləşmiş Su Təchizatı Agentliyi tərəfindən məhkəməyə verilib.
Məhkəmə də qətnamə qəbul edərək borcun ödənilməsini istəyir…
Elçin Əzizov deyir ki, bu məsələni araşdırarkən özü də təəccüblənib:
-“Qobustandan çıxanda oradan qeydiyyatdan çıxmışam və Lökbatanda yaşayıram, suyu da oradan ödəyirəm. Amma indi mənə deyirlər ki, guya Qobustandakı ünvanda borcum var. Necə ola bilər ki, mən yaşamadığım, heç su xəttinin mənə aid olmadığı yerdən borclana bilərəm?Adıma açılan abonent müqaviləsində imzam ya yoxdu,ya da saxtalaşdırılıb.
Məhkəmə də mənim iştirakım olmadan qərar çıxardığına görə arayışlarım əlimdə qalıb ki,mən o ünvanda 26 ildir yaşamıram…”
Məsələ təkcə bir şəxsin borcu deyil, sistemdəki nəzarətsizliyin və şəffaflıq çatışmazlığının nümunəsidir. Belə hallarda “abonent kodu kim açır?”, “kimin icazəsi ilə vətəndaşın adından sistemə qeydlər daxil edilir?”, “nəzarət orqanı hara baxır?” kimi suallar açıq qalır.
Bu kimi hallarda kommunal qurumlar məsuliyyəti vətəndaşın üzərinə yükləmək əvəzinə, daxili audit aparmalı, sistemdəki saxta və ya səhv qeydiyyatları araşdırmalıdır. Çünki vətəndaşın şəxsiyyətindən icazəsiz istifadə həm mülki, həm də cinayət məsuliyyəti doğura bilər.
Bu hadisə su təchizatı sahəsində illərlə formalaşmış bürokratik sistemin köhnə “suyu”nu yenidən gündəmə gətirdi.
Bəlkə də artıq vaxtıdır, “borc yükləmə” deyil, “ədalət yükləmə” sisteminə keçək?!
Zaur Talıblı
