Haqq.az tanınmış kosmetoloq Sona Nazimlə özəl müsahibəni təqdim edir.
-Sona xanım, öncəliklə gəlin bu günə qədər keçdiyiniz peşəkar fəaliyyət yolunuza nəzər salaq. Kimdir, Sona Nazim?
-Mən Dr. Sona Nazim Yaqubova, estetik tibb sahəsində fəaliyyət göstərən həkiməm. İşimdə əsas məqsədim pasiyentlərimin fərdi gözəlliyini qoruyaraq təbii, sağlam və harmonik nəticələr əldə etməkdir. Estetik tibb daim inkişaf edən bir sahə olduğu üçün beynəlxalq konqreslərdə, elmi seminarlarda və workshoplarda aktiv iştirak edərək bilik və təcrübəmi davamlı şəkildə yeniləyirəm. Son olaraq Fransanın Paris şəhərində keçirilən IMCAS Congress kongresində iştirak etdim. Bu kongres estetik tibb və dermatologiya sahəsində dünyanın ən nüfuzlu tədbirlərindən biridir. Burada dünyanın müxtəlif ölkələrindən olan həkimlər, elm adamları və aparıcı şirkətlər bir araya gələrək ən son texnologiyalar, innovativ prosedurlar və elmi yeniliklər haqqında geniş təqdimatlar etdilər. Xüsusilə anti-aging yanaşmalar, inyeksion prosedurlar və dərinin regenerasiyası ilə bağlı mühazirələr mənim üçün çox maraqlı və faydalı oldu. Hazırda isə Türkiyənin İstanbul şəhərində keçirilən Fullface Congress kongresində iştirak edirəm. Burada əsas diqqət fullface konsepsiyasına — yəni üzə bütöv və harmonik yanaşmaya yönəlib. Kongres çərçivəsində maraqlı mühazirələr, canlı prosedurlar və fərqli workshoplar keçirilir. Dünyaca tanınmış mütəxəssislərin təcrübələrini dinləmək və yeni metodikalarla tanış olmaq mənim peşəkar inkişafım üçün çox dəyərlidir. Mənim üçün bu cür beynəlxalq tədbirlərdə iştirak etmək yalnız yeni bilik qazanmaq deyil, eyni zamanda pasiyentlərimə daha təhlükəsiz, müasir və keyfiyyətli xidmət təqdim etmək baxımından da çox önəmlidir.
-Bilirsiniz, bu gün kosmetoloji xidmətlər çox sürətlə yayılır. Pasiyentlər düzgün və peşəkar kosmetoloqu necə seçməlidir?
-Pasiyent ilk növbədə mütəxəssisin tibbi təhsilinə, sertifikatlarına və praktik təcrübəsinə diqqət etməlidir. Sosial şəbəkədəki görüntülərdən çox, təhlükəsizlik və peşəkarlıq önəmlidir. Düzgün yanaşma hər zaman fərdi konsultasiya və doğru diaqnostikadan başlayır.
-Ucuz və sürətli nəticə adı altında bir sıra kosmetoloji xidmətlər var. Bu məsələyə münasibətiniz?
-Estetik tibbdə ən vacib məsələ təhlükəsizlikdir. Ucuz və sürətli nəticə vədləri bəzən ciddi fəsadlara səbəb ola bilər. Keyfiyyətli preparatlar, düzgün yanaşma və peşəkar mütəxəssis uzunmüddətli və sağlam nəticənin əsas şərtidir.
-Gözəllik salonlarında kosmetoloji prosedurların aparılması qadağandır.Vətəndaşlar niyə hələ də məsələnin ciddiliyini qəbul etmək istəmir?
-Çünki bir çox insan estetik prosedurları sadə kosmetik xidmət kimi qəbul edir. Halbuki bu prosedurlar tibbi müdaxilədir və steril şərait, tibbi bilik və peşəkar nəzarət tələb edir. Yanlış seçim isə sağlamlıq üçün ciddi risklər yarada bilər.
-Bu gün kök hüceyrə prosedurları geniş şəkildə təklif olunur, amma bu sahədə ciddi suallar və narahatlıqlar da var. Pasiyentlər yanlış seçim etməmək üçün konkret olaraq hansı meyarlara diqqət etməlidir?
-Kök hüceyrə prosedurları yalnız elmi əsaslandırılmış və lisenziyalı tibbi müəssisələrdə aparılmalıdır. Pasiyent istifadə olunan metodun təsdiqlənmiş olub-olmamasını, proseduru həyata keçirən həkimin ixtisasını və preparatların mənşəyini mütləq araşdırmalıdır. Sağlamlıqla bağlı qərarlarda reklamdan çox, tibbi təhlükəsizlik əsas götürülməlidir.
Sevil
