Bu gün – 3 avqust Azərbaycan Ordusunun mayoru, Birinci Qarabağ müharibəsinin və 44 günlük Vətən müharibəsinin iştirakçısı Nasir Məlikovun doğum günüdür.
Nasir Məlikov 1972-ci il avqustun 3-də Əli-Bayramlı (indiki Şirvan) şəhərində anadan olub. Hərb sənətinə olan marağı onu 1986-cı ildə Cəmşid Naxçıvanski adına Hərbi Liseyə gətirib. 1989-cu ildə liseyi uğurla başa vuran Nasir Məlikov sonrakı illərdə hərbi təhsilini davam etdirərək Vətənə xidmət yolunu seçib.
1992-ci ildə Birinci Qarabağ müharibəsində döyüşlərə qatılaraq torpaqlarımızın müdafiəsində şərəflə xidmət edib. Müharibədən sonrakı dövrdə də Azərbaycan Ordusunda müxtəlif məsul vəzifələrdə çalışıb, peşəkar zabit kimi formalaşıb və şəxsi heyətin hazırlığında mühüm rol oynayıb.
Azərbaycan xalqının şanlı Zəfərlə başa vurduğu 44 günlük Vətən müharibəsində Nasir Məlikov tabor komandiri kimi ön cəbhədə xidmət göstərib. Döyüş tapşırıqlarını yüksək peşəkarlıqla yerinə yetirərək şəxsi heyətə rəhbərlik edib və torpaqlarımızın işğaldan azad olunması uğrunda gedən döyüşlərdə iştirak edib.
Bu əlamətdar gündə mayor Nasir Məlikovu doğum günü münasibətilə səmimi-qəlbdən təbrik edir, ona möhkəm cansağlığı, uzun ömür, ailə səadəti və şərəfli xidmətində yeni nailiyyətlər arzulayırıq. Vətənə sədaqətlə xidmət edən belə zabitlərin ömür yolu gənc nəsil üçün vətənpərvərlik və fədakarlıq nümunəsidir…
Doğum gününüz mübarək, cənab mayor!
Zaur Talıblı
