Azərbaycanda dövlət satınalmaları ilə bağlı yeni narazılıq gündəmə gəlib. Bir qrup sahibkar tərəfindən ölkənin ali dövlət qurumlarına – Prezident Administrasiyasına, Hesablama Palatasına, Korrupsiyaya Qarşı Mübarizə Baş İdarəsinə və digər aidiyyəti strukturlara rəsmi müraciət ünvanlanıb. Müraciətdə bəzi tenderlərlə bağlı araşdırma aparılması xahiş olunur.
Müraciətdə qeyd edilir ki, Azərbaycan Dövlət Su Ehtiyatları Agentliyinin Regional Su Meliorasiya Xidmətinin elan etdiyi tenderlərdə iştirak edən müəyyən şirkətlərin fəaliyyəti şübhə doğurur. Məlumatlara görə, eyni şirkət müxtəlif subpodrat sənədləri təqdim etməklə son aylarda 30-dan artıq tenderdə qalib elan edilib. Halbuki hər bir tenderin icra müddəti 6 ay nəzərdə tutulduğu halda, məhdud resurslara malik və yeni yaranmış bir şirkətin, eyni vaxtda bu qədər həcmli layihələri həyata keçirməsi texniki və maliyyə baxımından mümkün sayılmır.
Müraciətdə araşdırılması tələb olunan əsas məqamlar:
Təcrübə meyarı və subpodrat müqavilələrinin həqiqiliyi;
Bu subpodrat müqavilələr üzrə, İşçi heyəti barədə təqdim edilən hesabatların real vəziyyəti əks etdirib-etdirməməsi;
Bu subpodrat müqavilələr üzrə, Layihələrin icrası zamanı materialların mənşəyi və maliyyə sənədlərinin düzgünlüyü;
Bu subpodrat müqavilələr üzrə, Şirkətlərin bank dövriyyəsi və təhvil-təslim aktlarının qanuniliyi;
Bu subpodrat müqavilələr üzrə, Satınalma təşkilatı və Antiinhisar qurumunun bu hallara münasibəti.
Müraciət müəllifləri bildirirlər ki, məqsəd hər hansı hökm vermək deyil, sadəcə aidiyyəti dövlət qurumlarının obyektiv araşdırma aparmasını təmin etməkdir. Onların sözlərinə görə, dövlət vəsaitlərinin şəffaf istifadəsi və ədalətli rəqabət prinsiplərinə riayət olunması ölkə rəhbərliyinin prioritet siyasət istiqamətidir.
“Bizim məqsədimiz qəti ittiham irəli sürmək deyil. Sadəcə dövlət orqanlarının obyektiv araşdırma apararaq dövlət vəsaitlərinin təyinatı üzrə xərclənməsinə nəzarəti təmin etməsidir,” – müraciətdə qeyd olunur.
Sahibkarlar ümid edirlər ki, yoxlamalar nəticəsində qanunsuzluqlar təsdiqlənərsə, həmin tenderlərin nəticələri ləğv ediləcək, məsul şəxslər barəsində tədbirlər görüləcək və gələcəkdə oxşar halların qarşısının alınması üçün əlavə mexanizmlər tətbiq olunacaq.
