Bu gün Vətən uğrunda canından keçən qəhrəman şəhidimiz Fikrət Zeynalovun doğum günüdür. O, 17 dekabr 1995-ci ildə Hacıqabul rayonunun Rəncbər kəndində dünyaya göz açıb. Uşaqlıqdan həmişə zəhmətkeşliyi, sakit təbiəti və vətənpərvərliyi ilə seçilib.
2013–2017-ci illərdə Gəncə şəhərində Azərbaycan Texnologiya Universitetində ali təhsil alan Fikrət Zeynalov, təhsilini başa vurduqdan sonra Vətənə xidmət yolunu seçib. 2017–2018-ci illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. Xidmətini şərəflə başa vuran Fikrət 2018-ci ildən etibarən “kiçik gizir” hərbi rütbəsində müddətdən artıq həqiqi hərbi qulluqçu kimi orduda qalaraq xidmətini davam etdirib.
Xüsusi Təyinatlı Qüvvələrin kiçik giziri, peşəkar snayper olan Fikrət Zeynalov 2020-ci il sentyabrın 27-də başlanan Vətən müharibəsində ön cəbhədə döyüşüb. O, Füzuli rayonunun azadlığı uğrunda gedən ağır və taleyüklü döyüşlərdə böyük igidlik nümayiş etdirib. 16 oktyabr 2020-ci ildə Füzuli–Xocavənd istiqamətində gedən döyüşlər zamanı şəhidlik zirvəsinə ucalıb.
Fikrət Zeynalov Vətən qarşısında vəzifə borcunu sonadək, şərəflə yerinə yetirdi. Onun göstərdiyi qəhrəmanlıq Azərbaycan dövləti tərəfindən yüksək qiymətləndirilib. Azərbaycan Prezidenti İlham Əliyevin Sərəncamlarına əsasən, şəhidimiz ölümündən sonra “Vətən uğrunda”, “Cəsur döyüşçü”, “Füzulinin azad olunmasına görə”, “Kəlbəcərin azad olunmasına görə” medalları və 3-cü dərəcəli “Rəşadət” ordeni ilə təltif edilib.
Bu gün Fikrət Zeynalovun doğum günüdür. O, aramızda olmasa da, adı xalqın yaddaşında, qəhrəmanlar sırasında əbədi yaşayır. Onun yarımçıq qalan ömrü Vətənin bütövlüyü ilə tamamlandı.
Ruhu şad olsun.
Zaur Talıblı
