27 Sentyabr – Anım Günü ilə əlaqədar Hacıqabul rayonunda silsilə tədbirlər keçirilib.
Əvvəlcə rayon rəhbərliyi, idarə və müəssisə rəhbərləri, şəhid ailələri və ictimaiyyət nümayəndələri tərəfindən şəhidlərin məzarları ziyarət olunub, onların əziz xatirəsi ehtiramla yad edilib.
Daha sonra Anım Günü ilə bağlı Hacıqabulda ağacəkmə aksiyası təşkil olunub. Aksiyada Hacıqabul Rayon İcra Hakimiyyətinin başçısı Sevindik Hətəmov, icra hakimiyyətinin əməkdaşları, idarə və müəssisə rəhbərləri, eləcə də şəhid ailələrinin üzvləri iştirak ediblər.
Aksiya çərçivəsində əraziyə şam ağacları əkilib, yaşıllıq zolaqlarının genişləndirilməsi istiqamətində işlər görülüb.
Keçirilən ağacəkmə aksiyası şəhidlərin əziz xatirəsinə ehtiramın ifadəsi olmaqla yanaşı, ətraf mühitin qorunmasına və Hacıqabulun daha da yaşıllaşdırılmasına töhfə verib.
Zaur Talıblı
