Yazar Dəniz Rüzgarın yeni kitabı – Qərənfildən Xarıbülbülə – oxucuların ixtiyarına verilib. Kitabın təqdimat mərasimi 8 iyun 2025-ci il tarixində Respublika Veteranlar Birliyinin Şəhidlər Xiyabanı ərazisində yerləşən mərkəzində baş tutub.
Tədbirdə şəhid ailələri,qazilər,müharibə iştirakçıları, oxucular və media nümayəndələri iştirak ediblər.
Təqdimatda Dəniz Rüzgar, yeni kitabının yaranma səbəbləri, vətənpərvərlik duyğularından bəhs edib.
Kitabda yer alan məqalələr,xatirə yazıları Azərbaycan xalqının yaşadığı ictimai-siyasi, mənəvi proseslərə vətənpərvərlik baxış bucağından yanaşılır.
“Qərənfil” sovet dövrü repressiyalarını, 20 Yanvar faciəsini, “Xarıbülbül” isə Qarabağ zəfərini, şəhidlərin əziz xatirəsini simvolizə edir. Beləliklə, kitab həm də milli yaddaşın vətənpərvərlik salnaməsi kimi dəyərləndirilir.
Tədbirdə çıxış edən ölkənin bölgələrindən gələn şəhid ailələri,qazilər Dəniz Rüzgarın yazar dünyasını yüksək qiymətləndirib, onun sözə verdiyi dəyəri, şəhidlərə və qazilərə verdiyi dəyərlərə görə təşəkkür etdilər.
Təqdimatın sonunda müəllif oxucular üçün kitabını imzalayıb və onların suallarını cavablandırıb.
Bu kitab yalnız mətnlər toplusu deyil, həm də Azərbaycan insanının tarixi yaddaşına, ağrısına və qüruruna həsr olunmuş mənəvi bir körpüdür – qərənfildən xarıbülbülə aparan bir yol.
Zaur Talıblı
