Qəhrəmanlıq salnaməsini qanları ilə vətən torpağına yazan şəhidlərimizin adlarının tarixə yazılması üçün ərsəyə gələn “VƏTƏN FƏDAİLƏRİ” layihəsi çərçivəsində tələbələrlə görüşün növbəti ünvanı Azərbaycan Respublikası Dövlət Gömrük Komitəsi Akademiyası oldu.
Tədbirdə ilk olaraq şəhidlərimizin əziz xatirəsi bir dəqiqəlik sükutla anıldı və Azərbaycan Dövlət Himni səsləndirildi. Ardınca Dövlət Gömrük Komitəsinin rektoru general-mayor Qulu Novruzov çıxış edərək Manya Səxavətqızının yaradıcılığından geniş şəkildə danışdı. “VƏTƏN FƏDAİLƏRİ” layihəsinin rəhbəri yazıçı, jurnalist, AYB-nin və AJB-nin üzvü Manya Səxavətqızı və layihənin dəstəkçisi Şahin Məmmədov ərsəyə gətirdikləri layihənin mahiyyətini vurğulayaraq öz düşüncələrini bölüşdülər.
Tədbirdə iştirak edən Qəhrəmanov Orxan Səlvər oğlunun anası Arzu xanım, İsmayılzadə Məhəmməd Füzuli oğlunun anası Miranə xanım və Rəfiyev Ülvi Rəfail oğlunun anası Səyyarə xanım çıxış edərək duyğularını dilə gətirdilər. General-mayor Qulu Novruzov Manya Səxavətqızına DGKA-nın xüsusi hədiyyəsini təqdim etdi. Tədbirin sonunda viktorina keçirildi və qaliblərə hədiyyələr təqdim olundu.
