Son günlər belə bir məlumat yayılıb ki, telegram dataları internetə sızdırıb. Qabaqlayıcı tədbir olaraq da təklif olunur ki, nömrəyə bağlı olan teleqram və vatsap hesabları silinsin. Məsələ ilə bağlı Azərbaycan İnformasiya və Kommunikasiya Texnologiyaları Sənayesi Assosiasiyasının İdarə Heyətinin sədri Elvin Abbasovla danışdıq.
Elvin Abbasov bildirdi ki, teleqramda məlumat sızması ilə bağlı yayılan xəbərlər narahatlıq yaratsa da bu, bütün istifadəçiləri əhatə edən təsdiqlənmiş hadisə olduğu sübut olunmayıb:
“Əslində, əvvəllər bəzi hallarda fərdi cihazlara yoluxmuş zərərli proqramlar vasitəsilə istifadəçilərin şifrələri və elektron poçt ünvanları oğurlanaraq darknet forumlarında paylaşılmışdı. Lakin bu, birbaşa Telegram sistemindən deyil, istifadəçilərin şəxsi təhlükəsizlik zəifliklərindən qaynaqlanmışdı. Ona görə də hesabların və ya onlara bağlı vatsap profillərinin kütləvi şəkildə silinməsi ilə bağlı çağırışlar həqiqəti əks etdirmir. Ən doğru addım vətəndaşların öz hesablarını daha güclü qorumasıdır – şifrələrin dəyişdirilməsi, iki mərhələli təsdiqləmənin aktiv edilməsi və şübhəli keçidlərdən uzaq durmaq əsas tədbirlər sırasındadır. Əgər istifadəçi hesabında hər hansı şübhəli fəaliyyət görürsə, Telegram-ın “Devices” bölməsindən icazəsiz girişləri silməsi tövsiyə olunur. Yəni, panikaya düşmək yox, təhlükəsizlik vərdişlərini gücləndirmək ən düzgün yanaşmadır.”
Sevil Akifqızı
