Yol mədəniyyəti hər bir cəmiyyətin nizam-intizam göstəricisidir və yollarda nişanlama xətləri həmin mədəniyyətin vacib elementlərindən biridir. Təəssüf ki, Saatlı rayonundan keçən yolun müəyyən hissəsində heç bir nişanlama xəttlərinin olmadığı müşahidə edilib. Bu vəziyyət isə sürücülərin haqsız yerə cərimələnməsi ilə nəticələnir.
Nişanlama xətləri olmayan yollarda sürücülər məcburi manevrlər etməyə məruz qalırlar, bu zaman isə ya kameralar tərəfindən qeydə alınır, ya da yol polisi tərəfindən cərimələnirlər. Polis öz mövqeyindən haqlı görünür, sürücü isə haqsızlıqla üz-üzə qalır. Axı yolda heç bir ayrıcı zolaq mövcud deyil ki, sürücü ona əsaslanaraq hərəkət etsin. Beləliklə, sürücü ilə yol polisi birbaşa qarşıdurmaya girir, ancaq bu vəziyyətin həqiqi səbəbkarı AYNA agentliyi olur.
Qeyd etmək lazımdır ki, əvvəllər yolların nişanlanma xətləri “SİQNAL” idarəsi tərəfindən çəkilsə də, bu səlahiyyət artıq AYNA-ya verilib. Amma görünən odur ki, AYNA bu məsuliyyəti layiqincə yerinə yetirmir. Yolların nişanlama xəttlərinin çəkilməməsi suallar doğurur: Dövlət bu işə vəsait ayırmırmı, yoxsa AYNA bu etimadı doğrultmaqda çətinlik çəkir?
Ümid edirik ki, hazırladığımız material məsələni işıqlandıraraq lazımi tədbirlərin görülməsinə səbəb olacaq. Axı AYNA adını “şəffaflıq” ilə bağlayır, və bu şəffaflıq özünü işdə də göstərməlidir. Yollarda nişanlama xəttlərinin olmaması sürücülər və yol polisi arasında anlaşılmazlıq yaradır və bu problemin tezliklə həll olunması vacibdir.
Mirsahib Rahiloğlu
