İranın Azərbaycandakı səfirliyinin müvəqqəti işlər vəkili Seyid Cəfər Ağayi Məryan Xarici İşlər Nazirliyinə çağırılıb. Bu barədə Azərbaycan XİN-nin rəsmi internet saytı xəbər verir.
Məlumata görə, görüşdə 2024-cü il dekabrın 29-da Ərdəbildə İranın ali rəhbərinin Ərdəbil əyalətindəki nümayəndəsi, Ərdəbilin cümə imamı Seyid Həsən Amelinin iştirak etdiyi və İranın Radio və Televiziya Təşkilatının “Xəbər” kanalında yayımlanan tədbirdə Azərbaycana və Prezident İlham Əliyevə qarşı səsləndirilən təhqiramiz ifadələrə görə İran tərəfinə sərt etiraz bildirilib.
Eyni zamanda, son zamanlar İranda əhali arasında açıq-aşkar şəkildə anti-Azərbaycan əhval-ruhiyyəsinin ciddi şəkildə qızışdırılması ilə əlaqədar narazılıq diqqətə çatdırılıb. Xarici İşlər Nazirliyi belə təxribatlara son qoyulmasını tələb edib.
