24 iyun 2025-ci il tarixdə Azərbaycan Respublikası Nazirlər Kabineti aparatının rəhbəri, cənab Rüfət Məmmədovun müvafiq göstərişinə əsasən Hacıqabul rayonunda “26 iyun – Narkomaniyaya və Narkobiznesə qarşı Beynəlxalq Mübarizə Günü” ilə əlaqədar Rayon İcra Hakimiyyətində fəaliyyət göstərən Narkomanlığa və narkotik vasitələrinin qanunsuz dövriyyəsinə qarşı mübarizə üzrə komissiyanın və aidiyyəti qurumların iştirakı ilə əhalinin maarifləndirilməsi məqsədi ilə tədbir keçirildi.
Tədbirdə Rayon İcra Hakimiyyəti başçısının birinci müavini Saleh Ələskərov, İcra Hakimiyyəti aparatının, Təhsil, Səhiyyə, Mədəniyyət, Gənclər və İdman, Ailə qadın problemləri və eyni zamanda Dini Qurumlarla iş üzrə Dövlət Komitələrinin yerli bölmələrinin məsul işçiləri və gənc nəslin nümayəndələri iştirak edib.
Komissiya üzvləri tərəfindən narkomaniya, onun doğurduğu fəsadlar, narkotiklərin insan orqanizminə məhvedici təsiri, cəmiyyətə və insanların sağlamlığına ziyanı, törətdiyi sosial bəlalar, mövcud problemlər və onların aradan qaldırılması yolları və digər məsələlər müzakirə olunub.
Tədbirdə Rayon İcra Hakimiyyətinin hüquq şöbəsinin müdiri Zaur Şirəliyev, rayon Təhsil sektorunun məsləhətçisi Loğman Səmədov, rayon MRX PHŞ-nın laboratoriya şöbəsinin müdiri Azad Həsənov, rayon Gənclər və İdman idarəsinin məsləhətçisi Rahid Balakişiyev və rayon MRX PHŞ-nın həkimi Gülşən Qəmbərova çıxışlar edərək Narkomanlığa və narkotik vasitələrinin qanunsuz dövriyyəsinə qarşı mübarizənin aparılması, Narkomaniyanın törətdiyi fəsadlar və onların aradan qaldırılması barədə hazırkı vəziyyət və görüləcək işlər barədə ətraflı məlumatlar verdilər.
