Azərbaycan əsilli məşhur şef Ali Magerro, son illərdə həm Azərbaycanda, həm Türkiyədə, həm də Rusiyada sürətlə tanınan kulinariya simalarından birinə çevrilib. Modern fast-food sahəsinə gətirdiyi yenilikçi yanaşma, sosial şəbəkələrdə böyük izləyici kütləsi və beynəlxalq layihələrdə iştirakı onun adını daha da məşhurlaşdırıb.
Haqq.az olaraq, bu dəfə Ali Magerro ilə həm peşəkar yolu, həm də şəxsi baxışları haqqında geniş bir müsahibə təqdim edirik:
-Ali bəy, ilk olaraq özünüzdən danışın. Necə başladı bu yol?
-Mən 1988-ci ildə Bakıda doğulmuşam. Çox kiçik yaşlardan yeməyə, xüsusilə də mətbəxə böyük marağım vardı. 14 yaşımda artıq restoran mutfağında işləməyə başlamışdım. Hər şey ilk gündən xəyal deyildi, sadəcə öyrənmək həvəsi və mətbəxə olan sevgim məni buraya qədər gətirdi. Sonralar müxtəlif ölkələrdə çalışdım, yeni mətbəxlərlə tanış oldum. Bu da mənim yaradıcılığımı daha da böyütdü.
-Sizi “modern fast-food şefi” adlandırırlar. Bu anlayışı necə izah edərdiniz?
-Fast-food çoxlarının gözündə sırf ucuz, sürətli və keyfiyyətsiz yemək kimi görünür. Mən isə bu stereotipi dəyişmək istəyirdim. Mənim üçün fast-food da estetik ola bilər, premium ola bilər, təmiz və yenilikçi ola bilər. Bütün dünyada insanlar sürətli həyat yaşayır, amma bu o demək deyil ki, keyfiyyətli yeməkdən imtina etsinlər. Mən də məhz bu boşluğu doldurdum:
fast-food + premium + modern təqdimat.
Bu yanaşma Türkiyədə və Rusiyada çox böyük qarşılıq tapdı.
-Sosial şəbəkələrdə də çox izlənirsiniz. Bunun səbəbi nədir?
-İnsanlar təmiz iş görən, səmimi danışan və öz işini sevən insanı hiss edir. Xüsusilə Türkiyədə çox sevildim. Orada fast-food mətbəxinə yenilik gətirmək, fərqli təqdimatlar etmək və təmiz iş göstərmək izləyicilərin diqqətini çəkdi.
Instagram-da paylaşdığım videolar, fast-food-u fərqli şəkildə hazırlamağım və mətbəxdəki kreativlik geniş kütlənin marağına səbəb oldu.
-Hazırda yaşadığınız yer Rusiyadır. Bu sizə hansı imkanları təqdim edir?
-Rusiyanın gastronomiya bazarı çox böyükdür. Burada həm öyrənmək, həm də özünü göstərmək üçün çox imkan var. Amma bütün bunlara baxmayaraq, mən ən çox Azərbaycan və Türkiyə izləyicilərindən dəstək görürəm. Bu da mənim üçün qürurvericidir.
-Ən çox hansı mətbəx sizə ilham verir?
-Əlbəttə ki, Azərbaycan mətbəxi. Bizim dadlarımız çox zəngindir. Mən fast-food-u modernləşdirərkən belə, alt fonda həmişə milli tatları hiss etdirirəm. Bu, mənim üslubumun əsas hissəsidir.
-Gələcək planlarınız nələrdir? Yeni layihələr gözlənilirmi?
-Hazırda Türkiyə və Rusiyada bir neçə markaya gastronomiya konsultasiyası verirəm. 2025-ci ildə isə öz adımla bağlı daha böyük bir layihə planlaşdırıram. Bu layihə fast-food-un premium versiyasını daha geniş auditoriyaya tanıdacaq. Gələcəkdə Azərbaycan bazarına da dönmək niyyətim var.
-Gənc şeflərə nə məsləhət verərdiniz?
-Mətbəx çətin sahədir. Hər kəs bacarmır. Amma iki şey mütləq vacibdir:
1. Qayda-intizam
2. Hər günü əvvəlkindən daha yaxşı etmək
Əgər sən bu iki şeyə əməl edirsənsə, hansı ölkədə olmağından asılı olmayaraq, uğur qazanırsan.
-Son olaraq izləyicilərə nə demək istərdiniz?
-Məni dəstəkləyən hər kəsə təşəkkür edirəm. Mənim məqsədim sadəcə yemək hazırlamaq deyil, həm də insanlara təmiz, sağlam, keyfiyyətli fast-food-u tanıtmaqdır. Hər zaman yeniliklərimlə qarşınızda olacağam.
