Ədəbiyyat aləminin böyük isimlərindən biri – tanınmış yazar, yazıçı-publisist Seyran Səxavətin yeni kitabının üç cildinin təqdimat mərasimi keçirildi. Tədbir təkcə bir kitabın təqdimatı deyildi; bu görüş sanki illərin yaddaşı, sözün ətri, insanın ömrə buraxdığı izlərin bayramı idi. Zaldakı ab-hava göstərirdi ki, Seyran Səxavət təkcə bir yazar olaraq deyil, həm də həyat tərzi, sözün adamı, ruhun təmizliyi kimi qəbul olunur.
“Seyran Səxavət Tanrıdan xalqımıza bir hədiyyədir”
Mərasimin açılışında səslənən bu cümlə tədbirin ruhunu tam ifadə edirdi. Çünki Seyran Səxavət yaradıcılığı ilə xalqın duyğularını dilə gətirməyi bacaran, yaşamı ilə isə sözün, halallığın, insanlığın məsuliyyətini daşıyan bir sənətkardır. Onu görən hər kəs sanki dostuyla, qardaşıyla görüşə gəlmişdi — nə rəsmi pafos vardı, nə də süni nitqlər. Hamı səmimi, hamı doğma idi.
Zala sığmayan insanlar göstərdi ki, Seyran Səxavətin oxucusu təkcə mütaliə edən insan deyil — onun oxucusu düşünən, xatırlayan, hiss edən bir kütlədir.
Yazar dostu Dayandur Sevgin belə insanları ,sevənləri yerləşdirməyə çətinlik çəkirdi…
İnsanlar kitabları imzalatmaq üçün növbəyə dayananda belə, bir-birilərinə “Seyran müəllimin sözləri ilə böyümüşük” deməkdən çəkinmirdilər.
Əl sıxmalar, qucaqlaşmalar, illərlə gizlənən xatirələrin dilə gəlməsi təqdimatı kiçik bir ədəbi bayrama çevirdi.
Təqdimatda tanınmış şairlər, yazıçılar, publisistlər ,millət vəkilləri də iştirak edirdi.Sabir Rüstəmxanlı,Rafiq Əliyev,Mənsim İbrahimov və başqaları çıxışlarında Seyran Səxavətin yaradıcılığı haqqında danışarkən tərif yox, minnətdarlıq ifadə edirdilər. Çünki onun yanında olmaq həm də sözə sədaqətin, müəllifə hörmətin, sənətə bağlılığın ifadəsi idi.
Bir yazar dostunun belə bir fikri zala xüsusi emosional rəng qatdı:
“Biz Seyran Səxavəti təkcə yazılarına görə yox, adamlığına görə də sevirik. Onun sözü kimi özü də düz, düzü kimi də təmizdir.”
Təqdim olunan üç cild kitabda Seyran Səxavət yenə özünəməxsus dəsti-xəttini qoruyub.Oxucuların reaksiyası göstərirdi ki, bu kitablar da əvvəlkilər kimi əlinə alınan kimi yarısına qədər oxunan, yarısında düşündürən, sonunda isə müəllifə “yenə yaz” dedirdən əsərlərdən olacaq.
Mərasimin sonunda Seyran Səxavət gələnlərə,kitab imzalatdıranlara təşəkkürünü bildirərək belə dedi:
“Sözüm sizindir, mən sadəcə yaza bildiyim qədər yazmışam.”
Bu sadə, lakin ağır mənalı cümlə salonda əsl ədəbiyyat adamına xas təvazökarlığı göstərdi. Alqışlar uzun sürdü, insanlar sanki yazıçıya deyil, onun yaratdığı neçə onilliklik (əslində min illik) yaddaşa təşəkkür edirdilər.
Seyran Səxavətin təqdimatı göstərdi ki, o, təkcə yazıçı deyil – xalqın yaddaşında yaşayan bir ənamdır. Onun yaradıcılığı da, həyatı da bir məktəbdir, bir örnəkdir.
Sözün qüruru, ədəbiyyatın nəfəsi, insanlığın üz xətti kimi -Seyran Səxavət bizimdir, xalqındır.
Zaur Talıblı
