Azərbaycanın gənc və istedadlı aktyorlarından biri olan Samir Nağızadə, son illərdə bir çox film, serial və müxtəlif layihələrdə iştirakı ilə tamaşaçıların diqqətini cəlb edib. O, həm də modelliyi, futbol karyerası və yaradıcı layihələri ilə fərqlənib. Gənc yaşına baxmayaraq, həm yerli, həm də beynəlxalq sahədə təcrübə qazanan Samir bəy, sənət dünyasında gənclərin qarşılaşdığı çətinliklər və gələcək planları barədə fikirlərini bizimlə bölüşdü:
-Samir bəy, uzun illərdir aktyorluqla məşğulsunuz. Sizi bu sahəyə çəkən nə oldu?
-Mənim aktyorluğa olan marağım çox gənc yaşlarda başladı. 2014-cü ildən bu işə başladım və o gündən bu sahədə özümü sınamağa davam edirəm. Aktyorluğ mənim üçün yalnız bir peşə deyil, həm də həyatımdakı ən böyük şansdır. Söz Gelsin yarışması, bir çox serial və film layihələri, eləcə də Hindistanlıların Azərbaycanda çəkdiyi Bollywood filmi – bütün bunlar mənə həm təcrübə qazandırdı, həm də sənət yolumu formalaşdırdı.
-Bir müddət modellik və video layihələri ilə də məşğul olmusunuz. Bu təcrübələr nə qazandırdı sizə?
-Bloggerlərlə video layihələrində iştirak etmək mənə yalnız kamera qarşısında performans bacarıqlarımı inkişaf etdirməyə deyil, həm də kütlə ilə ünsiyyət qurmağı öyrətdi. Həmçinin, bir müddət öz aktyor agentliyimi açmaqla idarəçilik, layihə planlaşdırması kimi sahələrdə də təcrübə topladım. Agentlik müəyyən səbəblərdən bağlandı, amma mənim üçün çox dəyərli bir təcrübə oldu.
-Siz həm də idman sahəsində uğur qazanmısınız. Futbol karyeranızdan danışa bilərsiniz?
-Bəli, mən peşəkar səviyyədə futbol oynayırdım, Araz-Naxçıvan klubunda qapıçılıq etdim. Təəssüf ki, zədələr səbəbindən futbola ara vermək məcburiyyətində qaldım. Amma idman mənim üçün hər zaman disiplin və məsuliyyət dərsi oldu, və bu dəyərləri aktyorluq karyerama da daşıdım.
-Samir bəy, Azerbaycan aktyor və model bazarının vəziyyətini necə qiymətləndirirsiniz? Nə əksikdir və nələr yaxşı işləyir?
-Açığı, Azərbaycanda bu sahədə hələ çox boşluqlar var. Oyunculuq və modellik sahəsində peşəkar təhsil imkanları kifayət qədər deyil. Uğurlu aktyor və modellər yetişdirəcək institutlar məhduddur, praktiki təcrübə və master-klasslar çox azdır.
Tamaşaçılar və prodüserlər bəzi məqamlara çox diqqət yetirirlər, amma bəzən işin keyfiyyətinə yetərincə önəm vermirlər. Məsələn, ssenarilər və montaj işləri bəzən natamam qalır, bəzi rollar düzgün işlənmir. Amma düzgün işləyən layihələrdə isə aktyorlar üçün geniş imkanlar açılır, performansları diqqətlə göstərilir.
Həmçinin, bizim ölkədə modellər üçün də standartlar hələ formalaşmayıb. İdeal ölçü və görünüşə çox önəm verilir, amma şəxsi istedad və performans bacarığı bəzən ikinci plana keçir. Əgər bu sahələrdə daha çox təlim, mentorluq və təcrübə imkanları yaradılsa, Azərbaycan daha çox istedadlı gənc yetişdirə bilər.
-Gələcək planlarınızdan danışın.
-Mənim hədəfim həm kino, həm serial, həm də modellik sahəsində peşəkar təcrübəmi artırmaqdır. Azərbaycanda bu sahədəki boşluqları doldurmaq, gənclərə dəstək olmaq, keyfiyyətli layihələrdə iştirak etmək istəyirəm. Həmçinin, gələcəkdə digər gənclər üçün mentorluq imkanları yaratmaq da məqsədlərim arasındadır.
-Son sözünüz nə olacaq?
-Sənət bir yolculuqdur və bu yol heç vaxt bitmir. Hər addımda öyrənmək, sınamaq və irəliləmək önəmlidir. Azərbaycanda imkanlar hələ tam deyil, amma istedad və həvəs varsa, hər şey mümkündür. Mən də öz yolumu bu prinsiplərlə davam etdirirəm.
Zaur Talıblı
